ରିପୋର୍ଟ : ବିରଞ୍ଚି ପ୍ରସାଦ //
ଗୁଣୁପୁର, (୧୪/୦୪) : ରାୟଗଡା ଜିଲ୍ଲା ଗୁଣପୁର ବ୍ଲକ ଅନ୍ତର୍ଗତ ଗୋଠଳପଦର ଗ୍ରାମ ର ମାଁ ଵାଙ୍ଗାରୀମାଙ୍କ ଐତିହାସିକ ଘଟଯାତ୍ରା ସମାପନ ହୋଇଯାଇଛି । ଦିର୍ଘ ଛଅ ବର୍ଷ ପରେ ଘର ଘର ବୁଲି ପୁଜା ପାଇଲେ ମାଁ ବାଙ୍ଗାରିମା ।
କରୋନା କଟକଣା ଯୋଗୁଁ ବନ୍ଦ ରହିଥିବା ମାଁ ଵାଙ୍ଗାରୀମାଙ୍କ ଘଟଯାତ୍ରା ଏବର୍ଷ ଵହୁ ଆଡମ୍ବର ସହକାରେ ପାଳନ କରାଯାଇଛି । ନଅ ଦିନ ବ୍ୟାପୀ ଚାଲିଥିଲା ମାଆଙ୍କ ଏହି ଘଟପର୍ଵରେ ଶତାଧିକ ମହିଳା ଓ ପୁରୁଷ କଳସ ବା ଘଟକୁ ମୁଣ୍ଡରେ ଧରି ଘର ଘର ବୁଲି ଥିଲେ । ଘର ଆଗରେ ମାଆଙ୍କୁ ଧୂପ, ଦୀପ, ଚନ୍ଦନ, ସିନ୍ଦୁର, ଝୁଣା ଓ ଫୁଲ ଦେଇ ପୂଜାର୍ଚ୍ଚନା କରାଯାଇଥିଲା । ଵାଦ୍ୟ ଵାଜଣା ଓ ତୂରିଭେରିର ଶବ୍ଦରେ ଗୋଠଳପଦର ଗ୍ରାମ ପ୍ରକମ୍ପିତ ହେଉଥିବା ଦେଖାଯାଇଛି ।
ଗ୍ରାମବାସୀ ମାନଙ୍କ ଭଳିକି ଭଳି ନୃତ୍ୟ ଗାଁ କୁ ଆସିଥିବା ଅତିଥି ମାନଙ୍କ ମନ ମୋହୁଥିଵା ଦେଖିବାକୁ ମିଳିଛି । ସୁଦୁର ଗଞ୍ଜାମ ଜିଲ୍ଲାରୁ ଆସିଥିବା ପୈାରାଣିକ “ରାମାୟଣ” ନାଟକର ପରିବେଷଣ ଯୁବପିଢିକୁ ପୈାରାଣିକ ଵିଷୟରେ ଜାଣିବାକୁ ଆକୃଷ୍ଟ କରିଥିଲା । ନଅ ଦିନ ଧରି ଚାଲିଥିବା ମାଆଙ୍କ କଳସ ଯାତ୍ରାରେ ଵହୁ ଦୂର ଦୂରାନ୍ତରୁ ବନ୍ଧୁବାନ୍ଧବ ଜ୍ଞାତି କୁଟୁମ୍ବ ଯୋଗଦେଇଥିଲେ ।
ମାନସିକ କରିଥିବା ଭକ୍ତମାନେ ନିଜ ନିଜ କଳସ ମୁଣ୍ଡରେ ଧରି ଵାଦ୍ୟ , ମହୁରି ଓ ସଂକୀର୍ତ୍ତନ ତାଳେ ତାଳେ ନୃତ୍ୟ କରୁଥିବା ଦୃଶ୍ୟ ଅତ୍ୟନ୍ତ ମନୋହର ଥିଲା । ଶେଷରେ ଗ୍ରାମବାସୀ ମାନେ ମାଁ ବାଙ୍ଗାରୀମାଙ୍କ କୃପା ଭିକ୍ଷା କରି କଳସ ଯାତ୍ରାର ସମାପନ କରିଥିଲେ ।