Related Contents

ରାଜ୍ୟରୁ ମଦ ନ ହଟିଲେ ଭୋଟ ବର୍ଜନ ଚେତାବନୀ ଦେଲା ମିଳିତ ଓଡିଶା ନିଶା ନିବାରଣ ଅଭିଯାନ

ଯାଜପୁର(ସତ୍ୟଜିତ ବାରିକ): ଯାଜପୁର ଜିଲ୍ଲାରେ ପହଁଚିଛି ମିଳିତ ଓଡିଶା ନିଶା ନିବାରଣ ଅଭିଯାନ | ଗତ ଫେବୃୟାରୀ ୨୩ ତାରିଖଠାରୁ ଆରମ୍ଭ ହୋଇଥିବା ମିଳିତ ଓଡିଶା ନିଶା ନିବାରଣ ଅଭିଯାନ ଶୁଭାରମ୍ଭ କରାଯାଇଛି ମଦ ମୁକ୍ତି ଅଭିଯାନ । ଭୁବନେଶ୍ୱର ଠାରୁ ପଦଯାତ୍ରା ମାଧ୍ୟମରେ ଆରମ୍ଭ କରାଯାଇଥିବା ଏହି ଅଭିଯାନ ପୁରୀ, ଜଗତସିଂହପୁର ଓ କେନ୍ଦ୍ରାପଡା ଦେଇ ବୁଧବାର ଯାଜପୁରରେ ପହଂଚିଛି ।

୧୧ ଦିନ ଧରି ୧୧ଟି ଜିଲ୍ଲା ଦେଇ ୧୧୦୦ କି.ମି ବ୍ୟାପୀ ହେବାକୁ ଥିବା ଉକ୍ତ ଅଭିଯାନରେ ଓଡିଶାର କୋଣ ଅନୁକୋଣରୁ ମଦ ବିରୋଧୀ ବହୁ ସଂଖ୍ୟକ ମହିଳା ଓ ପୁରୁଷ ଆନ୍ଦୋଲନକାରୀ ସାମିଲ ହୋଇ ବିଭିନ୍ନ ଜିଲ୍ଲାର ମୁଖ୍ୟ ଓ ଛକ ସ୍ଥାନ ଗୁଡିକରେ ସ୍ଥାନୀୟ ଜନସାଧରଣଙ୍କୁ ପଥପ୍ରାନ୍ତ ସଭା,ଶୋଭାଯାତ୍ରା, ବିପ୍ଲବୀ ସଂଗୀତ, ପ୍ଲାକାର୍ଡ, ଲିଫଲେଟ୍ ଓ ସ୍ଲୋଗାନ ମାଧ୍ୟମରେ ମଦ୍ୟପାନର କୁପରିଣା, ମହିଳାମାନଙ୍କ ଉପରେ ହେଉଥିବା ଅତ୍ୟାଚାର ଏବଂ ମଦ ହଟାଇବା ନେଇ ରାଜ୍ୟ ସରକାରଙ୍କ ଅପାରଗତ ସଂମ୍ପର୍କରେ ଜନଜାଗରଣ ସୃଷ୍ଟିକରିବା ସହ ୧୯୫୬ ନିଶା ନିବାରଣ ଆଇନ ତୁରନ୍ତ କାର୍ଯ୍ୟକାରୀ କରି ମଦମୁକ୍ତ ଓଡିଶା ଗଠନ କ୍ଷେତ୍ରରେ ଅଂଶୀଦାର ହେବାକୁ ସମସ୍ତଙ୍କୁ ନିବେଦନ କରୁଥିବା ବେଳେ ଦେଖିବକୁ ମିଳୁଛି।ଏହି ଅବସରରେ ଗତ ୨୭ ତାରିଖ ଦିନ ଅଭିଯାନର ପଦଯାତ୍ରୀ ମାନଙ୍କ ଦ୍ୱାରା ଯାଜପୁର ଟାଉନ୍ ବଜାର ଶୋଭାଯାତ୍ରା ମାଧ୍ୟମରେ ପରିକ୍ରମା କରଯାଇଥିଲା । ପରେ କୁଆଖିଆ ବଜାର ପରିକ୍ରମା କରାଯାଇ ସ୍ଥାନୀୟ ମେଲଣ ପଡିଆରେ ଏକ ଜିଲ୍ଲାସ୍ତରୀୟ ସାଧାରଣ ସଭା ଆୟୋଜିତ ହୋଇଥିଲା । ଏଥିରେ ବହୁ ସଂଖ୍ୟକ ମହିଳା ଆନ୍ଦୋଳନକାରୀ ଯୋଗଦେଇଥିଲେ । ସଭାରେ ଅଭିଯାନର ସକ୍ରିୟ କର୍ମୀ ସତ୍ୟବ୍ରତ ପୃଷ୍ଟି,ଇଂ ବିଶ୍ୱଜିତ ମହାନ୍ତି,ରମାକାନ୍ତ ମଣ୍ଡଳ,କାହ୍ନୁ ଚରଣ ବେହୁରା,କବିତା ପରିଡା,ସୁଶାନ୍ତ କୁମାର ଖଟୁଆ,ହିମାଂଶୁ ନାୟକ,ରାଜେଶ ଦେଓ,ପ୍ରିୟନାଥ ଆଚାର୍ଯ୍ୟ,ମଳୟ ତ୍ରିପାଠୀ ଓ ଗୋଲୋକ ପଲେଇ ପ୍ରମୁଖ ଉପସ୍ଥିତ ରହି ଦିନକୁ ଦିନ ମଦମୁକ୍ତି ନେଇ ଅଧିକରୁ ଅଧିକ ସଚେତନତା ସୃଷ୍ଟି ହେଲାଣି ଏବଂ ଆଗାମୀ ଦିନ ମାନଙ୍କରେ ସମଗ୍ର ରାଜ୍ୟ ଯଦି ମଦମୁକ୍ତ ନ ହୁଏ,ତେବେ କ୍ଷମତାସୀନ ଦଳଙ୍କୁ ଭୋଟ୍ ଦିଆଯିବ ନାହିଁ ବୋଲି କଡା ଚେତାବନୀ ଦେଇଥିଲେ ।

ବିଶେଷକରି ଗାଁ ଗହଳିରେ ଛତୁ ଫୁଟିଲା ଭଳି ଖୋଲୁଥିବା ମଦ ଦୋକାନ ଗୁଡିକ ଉଚ୍ଛେଦ କରି ମା’କୁ ସମ୍ମାନ ଦେବା ନ୍ୟାୟରେ ମହିଳାମାନଙ୍କୁ ସର୍ବଦା ସୁଖଶାନ୍ତିରେ ରଖିବାକୁ ସରକାରଙ୍କ ନିକଟରେ ଦାବି ରଖିଥିଲେ । ଶେଷରେ ଏହି ଅଭିଯାନ ଦଳ ଭଦ୍ରକ ଅଭିମୁଖେ ଗ୍ରସ୍ତ କରିଥିଲେ । ଏହି ଅଭିଯାନ ୨୮ ତାରିଖ ଦିନ ଭଦ୍ରକ,୧ ତାରିଖ ବାଲେଶ୍ୱର,୨ ତାରିଖ ମୟୂରଭଂଜ,୩ ତାରିଖ କେନ୍ଦୁଝର,୪ ତାରିଖ ଢେଙ୍କାନାଳ ଓ ୫ ତାରିଖ ଦିନ କଟକରେ ବିବିଧ ସଚେତନାମୂଳକ କାର୍ଯ୍ୟକ୍ରମ ସଂପାଦନା କରି ଭୁବନେଶ୍ୱର ପ୍ରତ୍ୟାବର୍ତ୍ତନ କରିବ ବୋଲି ସଭାପତି ପଦ୍ମ ଚରଣ ନାୟକ ଗଣ ମାଧ୍ୟମକୁ ସୂଚନା ଦେଇଛନ୍ତି।

Comments are closed.