ବାଲିଗୁଡା ମହୋତ୍ସବକୁ କୁଇ ସମାଜ ପକ୍ଷରୁ ବିରୋଧ

ବାଲିଗୁଡା(ବିଭୁତି ଲହରିଆ): କନ୍ଧମାଳ ଜିଲ୍ଲା ବାଲିଗୁଡା ମିନିଷ୍ଟାଡିୟମରେ ଫେବୃଆରୀ ୮ ଓ ୯ ତାରିଖ ହେବାକୁ ଥିବା ବାଲିଗୁଡା ମହୋତ୍ସବକୁ ସ୍ଥାନୀୟ ଲୋକେ ଓ କୁଇ ସମାଜ ପକ୍ଷରୁ ବିରୋଧ କରାଯାଇଛି ।

ଉପଖଣ୍ଡ ପ୍ରଶାସନ କିଛି ସ୍ବେଚ୍ଛାସେବୀ, କର୍ମଚାରୀ, ବ୍ୟବସାୟୀ ସଂଘକୁ ଧରି ମହୋତ୍ସବ ଆୟୋଜନ କରିବା ପାଇଁ ପ୍ରସ୍ତୁତି ଚଳାଇ ଥିବାବେଳେ କୌଣସି ଆଦିବାସୀଙ୍କୁ ନ ଡାକି କାର୍ଯ୍ୟକ୍ରମ କରୁଛନ୍ତି | ତା ଛଡା କନ୍ଧମାଳର ସଂସ୍କୃତି ଓ ପରମ୍ପରା ବଦଳରେ ପୋଷ୍ଟର ଓ ମଞ୍ଚରେ ଅନ୍ୟ ଜିଲ୍ଲାର ସଂସ୍କୃତି ରହିଛି । ସ୍ଥାନୀୟ ଅଞ୍ଚଳର ଲୋକ କଳା, ଲୋକ ବାଦ୍ୟ ସାମିଲ ନକରି ସିନେମା କଳାକାରଙ୍କୁ ଆଣି କାର୍ଯ୍ୟକ୍ରମ ଅନୁଷ୍ଠିତ କରିବା ପାଇଁ ସଜବାଜ ହେଉଛି । ପୂର୍ବରୁ ମହୋତ୍ସବ ବାଲିଗୁଡାରେ ଧରଣୀ ପେନୁ ମହୋତ୍ସବ ନାମରେ ନାମିତ କରାଯାଇଥିଲା କିନ୍ତୁ ଚଳିତ ବର୍ଷ କାହିଁକି ବାଲିଗୁଡା ମହୋତ୍ସବ ନାମ ଦିଆଯାଇଛି ବୋଲି ଆଦିବାସୀ ମାନେ ପ୍ରଶ୍ନ କରିଛନ୍ତି । ମହୋତ୍ସବ ଆୟୋଜନ କମିଟି ସାଧାରଣ ଲୋକଙ୍କ ଠାରୁ ଜବରଦସ୍ତ ଚାନ୍ଦା ଆଦାୟକୁ ମଧ୍ୟ କୁଇ ସମାଜ ବିରୋଧ କରିଛନ୍ତି ।

ବାଲିଗୁଡାର ଅଧିଷ୍ଠାତ୍ରୀ ଦେବୀ ମାଆ ପାଟଖଣ୍ଡାଙ୍କ ଚିତ୍ର ପୋଷ୍ଟର ଓ ମଞ୍ଚରେ ସ୍ଥାନିତ କରିବା ସହିତ କୁଇ ସମାଜର ପ୍ରତିନିଧି ଓ ସ୍ଥାନୀୟ ବାସିନ୍ଦାକୁ ସାମିଲ ନ କରି ପ୍ରଶାସନର ଏହି ଭଳି ନିଷ୍ପତ୍ତିକୁ ବିରୋଧ କରି ଆଗାମୀ ଦିନରେ ଆନ୍ଦୋଳନାତ୍ମକ ପନ୍ଥା ଅବଲମ୍ବନ କରାଯିବ ବୋଲି କୁଇ ସମାଜ ଚେତାବନୀ ଦେଇଛନ୍ତି । କୁଇ ସମାଜ ପକ୍ଷରୁ ଉପଜିଲ୍ଲାପାଳଙ୍କ ଉଦ୍ଦେଶ୍ୟରେ ସହକାରୀ ଜିଲ୍ଲାପାଳ ହରିଶ ଚନ୍ଦ୍ର ପ୍ରଧାନଙ୍କୁ ଲିଖିତ ଅଭିଯୋଗ କରିଛନ୍ତି | କୁଇ ସମାଜ କେନ୍ଦ୍ରୀୟ ସଭାପତି ଶ୍ରୀକାନ୍ତ ମଳିକ,ଉପସଭାପତି ମିର୍ଗୁ ମଳିକ ତୁମୁଡ଼ିବନ୍ଧ ସଭାପତି ଯୁବରାଜ ପାଟମାଝୀ, ବାଲିଗୁଡା ଏନଏସି କୁଇକୁଳ ସଭାପତି ବାଳ କୃଷ୍ଣ ମଳିକ କୁଟିକିଆ ସରପଞ୍ଚ ଦୟା ମଳିକ ପ୍ରମୁଖ ଦାଵୀପତ୍ର ଦେଇଛନ୍ତି l

One response to “ବାଲିଗୁଡା ମହୋତ୍ସବକୁ କୁଇ ସମାଜ ପକ୍ଷରୁ ବିରୋଧ”

  1. Manoj says:

    Baliguda re epari birodha jongu kounasi festival o kounasi enterteentert program hoi paru nahi